ភ្នំពេញ៖ រដ្ឋាភិបាលជប៉ុនផ្ដល់ថវិកាជាង ២០ម៉ឺនដុល្លារដល់កម្ពុជាសម្រាប់អនុវត្តគម្រោងដំឡើងប្រព័ន្ធផ្គត់ផ្គង់ទឹកស្អាតនៅឃុំកំពង់ឃ្លាំង ក្នុងខេត្តសៀមរាប។
បើតាមការផ្សាយព័ត៌មានរបស់ស្ថានទូតជប៉ុនប្រចាំកម្ពុជា ភារធារីស្តីទីនៃស្ថានទូតជប៉ុនប្រចាំកម្ពុជា លោក តានិណៃ អ៊ិឈិតុម៉ុ និងលោក ឯក សុនចាន់ តំណាងស្ថាប័នទទួលជំនួយ បានចុះហត្ថលេខារួមគ្នាលើកិច្ចសន្យាផ្តល់ជំនួយឥតសំណងនេះនាថ្ងៃទី១២ ខែមករា ឆ្នាំ២០២៣។
លោក តានិណៃ អ៊ិឈិតុម៉ុ បានលើកឡើងថា រដ្ឋាភិបាលជប៉ុនបានឯកភាពផ្តល់ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ គូសាណូណិ ជាថវិកាសរុបចំនួនជាង ២០ម៉ឺនដុល្លារសម្រាប់ការដំឡើងប្រព័ន្ធផ្គត់ផ្គង់ទឹកស្អាតនៅឃុំកំពង់ឃ្លាំង ក្នុងខេត្តសៀមរាប។
លោកជឿជាក់ថាជំនួយឥតសំណងនេះ នឹងលើកកម្ពស់គុណភាពជីវិតរបស់ប្រជាជនដែលរស់នៅក្នុងទីតាំងគម្រោងនោះ៕
